كتر غلبة ( ليش الحكومة عم تيننا ) .؟

خليل صارم · #1 06-13-2009, 06:24 PM

( يرجى الانتباه الى اللهجة السورية ) .
جارنا بو يوسف فتيلته قصيرة أقصر من فتيلة صيادي السمك بمحافظة طرطوس اللي نازلين تفجير قبالة المنطار القريبة من المياه اللبنانيه .. أما اللي دورهم يسمعوا ويمنعوا ( سامع مش هون ) وهيك بيلعنوا أفطاس الثروة السمكية . . ومش كتير يعملوا هيك لأنو اللي دورهم يكافحوا المخدرات بمحافظة طرطوس ضاربهم العمى ويظهر والله أعلم إنو اللي بيوزعوا المخدرات (قاريين البسبيسة عليهم ) منشان هيك مطنشين لأنو الموزعين والعلم عند الله إيدهم طايلة وراح يصيروا بكرا ( بيزنس مان ) وداعمين للاقتصاد الوطني وحماة الوطن و العروبة والطبقات الشعبية والكدح والنتح والمتح .. وهيك عم يزداد أعداد الشباب المنظمين للوائح التعاطي والادمان بطرطوس وخاصة في راس شغري ووادي الشاطر والرادار ..وحلال عالشاطر .. مش هيك ياحراس المجتمع والوطن ويامكافحي البطالة والعمل في خدمة المواطن .. ولك روحوا تضربوا وألله لايبلي مجتمع متل مانحنا مبتلين فيكم وبأشكالكم . . ونصيحة لله .. يابتشتغلوا بتقوى الله وبتحترموا شرف الوظيفة وبتكافحوا التعاطي من الأول مش من الأخير يعني من ( التجار والموزعين ) يإما بدنا نعمل جمعيات خاصة لمكافحة هيك ظواهر ..واللي بيبتلي ابنه بالإدمان بيصير من حقه يطارد الموزعين ويقتلهم متل الكلاب الضالة ..المسعورة .. شو رأيكم .. صدقوني إنو هيدا ممكن يحصل .. واذا تحركتوا بدكم تاكلوها لأننا بدنا نعتبركم شركاء إلهم ..
( ويمكن يكون صحيح ) واللا شو معنى الاهمال والتقصير والتطنيش .
المهم ..بيرجع مرجوعنا لـ بويوسف .. قاللي وهو معصب وطا لع خلقو عالدرجة سبعة بمقياس ريختر . . شو ياجار أنا متأكد إنو الحكومة عم تهيننا وتذلنا .
• الله يسترنا من لسانك اليوم يابويوسف .. خير انشالله شو صاير جديد ..؟
- رد أبو يوسف بعصبية شديدة وكأن البركان قد بدأ يرسل انذاراته متل البركان المتوقع في السعودية واللي عم بيحذروا منو . .. ولك ياجار إسألني شو اللي ماصار .. ؟.. ولك ياعمي منسمع مقابلات الرئيس وتوجيهاته وأوامره لـ هالبني آدمين .. إنو المواطن وراحة المواطن وحقوق المواطن والتخفيف عن المواطن هيه الأهم .. بيقوموا بيلعنو أبو المواطن واذا بتحكي ..بيقولولك انك فهمت غلط .. هلق بدك تقللي .. هني حمير واللا نحنا حمير ..بدي إفهم .؟ واللا الرئيس عم يحكي معهم باللغة الصينية أو السنسكريتيه ..؟
• له.له.له ..سلامة عقلك يابو يوسف هني مش حمير .. بس بيناتهم ولاد حرام وولاد كلب .. اخدت ايدهم عالفساد وماعاد يعرفوا يبطلوا متل مدمن المخدرات بدو عزل وحجر ويبعد عن الناس حتى يشفى .. بس مع هيدول .. مابينفع العزل والحجر لوحده صار بدهم ضرب بالشحاطة العتيقة والقباقيب ليل نهار وبسبب وبلا سبب . . حتى يموتوا متل مامات زوجها لشجرة الدر . . لأنهم بدل ماينفذوا التعليمات بيقوموا يضيفوا تعقيدات على تعقيدات وبيفسروا التوجيهات متل تفسير التكفيريين للدين .. بتقولوللهم الأرض عم بتدور بيردوا عليك ..استغفر الله الأرض قاعدة على قرون ثور .. وهيدول الفاسدين بدهم يقعدوا كل شي على قرونهم .. وتفاسيرهم كلها مقورنة متلهم لأنو كل فاسد مقورن وابن ستين ألف كلب .. لأ والحكومة بتقول هاتوا دليل .؟. كيف بدك تجيب الدليل ..إذا كان ( جحا والمفتاح بإيدو ) . . والألعن إنو الحكومة ( لما مسكت اللي كان يسرق الكفن جابت اللي بيسرق الكفن وبيدق خازوق بقفا الميت ) ( مش هيك يابو الزين ) . يعني لما بتشيل فاسد .. بتقوم بتجيب واحد خرمان ع الليرة بيكون ألعن وأدق رقبة منشان نترحم عاللي راح ونسد بوزنا وماعاد نحكي .. وعلى هالمسطرة فيك تقيس .. بدي قول لك .. هلق بتعرف أسماء أعضاء مجلس الشعب اللي بيمثلوا المحافظة ..؟ .- لاوالله مابعرف واذا بدي اتعب حالي شوي ..يمكن اذكر اسم شي واحد بيقوم بيطلع من دورة قديمة وخالصة مدة صلاحيتها .
• طيب سألت حالك ليش مابتتذكر أسماؤهم ..؟!!
- لاوالله ماسألت ...وليش بدي اتذكر ... شو دخلني فيهم .. ماإلنا علاقة فيهم ..و..ماإلهم علاقة فينا ..؟
• طيب مش إنت َ انتخبتهم يابو يوسف ..؟
- يرحم أبوك اسكت ولاتجنني أكتر ماني جانن .. قال انتخبتهم ..قال .؟.. ولك إذا حطيت ورقة بالصندوق ..الله يبعتلها لأيدي بالكسر .
• دخيل عيونك ياجار.. ليش عم تدعي على حالك .. انت مادخلك .. لأنو من لحظة مانزلت أسماؤهم بلوائح الجبهة .. صاروا ناجحين ..ناجحين ..غصب عني وعنك .. ومنشان هيك بيكون الحكي صحيح يعني إنو لاإلنا علاقة فيهم ولا إلهم علاقة فينا وكل واحد من طريق وسبحان من يرزق بغير فاتورة وكشف حساب . ؟ لأ والأحلى كل واحد فيهم بيقعد يحلم يصير وزير واللا محافظ ( لأنو جاب الديب من ديلو ياخاي ) . لأ والأحلى من هيك انو كل واحد منهم كان ناتع صورة بلا برنامج انتخابي وكأنه مشهور متل هيفا وهبي ..والناس ميته بدباديبو .
- هلق نفس الـ شي جماعة مجلس المدينة ومجلس المحافظة .. ؟
• هو..هووووه .. قال نفس الشي ..قال .. ولاك ودفشة لـ ورا كماااان .. يعني هيدول أنا وأنت اللي نقيناهم وانتخبناهم . ؟ أكيد لأ ... طيب دخيلك على شووووو .. على البرامج تبعهم ..واللا ع السمعة تبعهم .. ولك مايكونوا من أبطال تحرير بلاد شفطستان ولهطستان ونحنا مش عارفين .. واللا البركة مجموعة من اللي قدموا اختراعات ودراسات وأبحاث بتنفع المدينة والمحافظة قاموا جابوهم منشان ينفذوها ..؟!!!! ولك ياعمي في ناس من بيناتهم مابيعرفوا غير كلمة واحدة ..بتقوللو مرحبا بيقولك ناولني .. بتسألوا الشرق من وين بيقوم بيمد ايدو عالغرب وبيقول ..حسب معرفتي ومعلوماتي ودراساتي وأبحاثي .. يمكن من هون .!!. في واحد منهم قد مانو خبير ياخيو..! وقدم خدمات للمدينة ياجار خلاها تسبق باريس .. ودوب صحته بسبب السهر في خدمة المجتمع والوطن الغالي .. ومسكين صار وزنه مش أكتر من ميه وعشرين كيلو .. قاموا مددولو دورة تانية .. أي شو يعني ..بوش احسن منو .. ماقعد دورتين عم بيخبص حتى لعن أبو الاقتصاد الأمريكي والاقتصاد العالمي كمان . . وأخونا اللي بمجلس المدينة ..حلف اللي حطو يمين إنو مابيشيلوا إلا بعد مايلعن أبو المحافظة ويصير هوه تاجر البناء والمتعهد الوحيد .. ولدواعي النضال والكدح والتحرير والبناء والتقدم والتطويث
( على رأي نجمنا المحبوب ياسر العظمة) .. كل يوم بينتعلك سيارة آخر موديل تماتيكي ..تماتيكي . وبتحكي لحالها وبتمشي لحالها وبتوقف لحالها .. لأنو اللي عم بيسوقها قد مانو ذكي جدا ً وقف المدينة وخرب حالها وفوت المجلس بمشاكل مع رئيس المجلس لأنو مابياكل ..وهيك مابيمشي الحال لأنو لازم ياكل .. قاموا اللي صنعوا السيارة دعموها بذكاء اصطناعي أحسن ماتخرب سمعة الشركة . والسيارة بترقص لحالها بدون ماتصفق الها . . اللهم حسد وضيقة عين كمان .. ليش هوه بيشفط ونحنا لأ .. مش البقرة بقرتنا ونحنا اللي عم ندفع تمن العلف تبعها .. !!
- هاها.. هه .. شفت إنو الحكومة عم تذلنا .. طيب بدي إفهم ليش هالعداوة بينها وبيننا .. ليش بيدوروا عالأنتيكا والمضروبين واللي ( رماهم البحر وماقدر يبلعهم ) وبيعملوا منهم واجهات اجتماعية وممثلين إلنا .. بدك أكتر من هيك إهانة وذل وعدائية للمجتمع .. لأ وبيطلع مين يقول شو ذنب الحكومة ..؟.. طيب لكن ذنب مين . ؟. أوعى حدا يقول ذنب الاستعمار والصهيونية العالمية ..؟
• العمى ..العمى .. إنت عم تقول فيها .. والله يمكن ومش بعيد .. لأنوإذا بدك تخللي مجتمع يتراجع لـ ورا .. ويفوت بالحيط .. جيب هيك ناس واعملهم واجهات اجتماعية وشوف كيف بتلعن أبو المجتمع والبلد .. ؟
- دخيلك ..هلق مادخلنا بالغميق كتير وخبصنا .. والله يستر .. ؟!!
• شو باينتك خفت .. وين البركان اللي كان راح ينفجر ..والهزة اللي على آخر مقياس ريختر .. ولا ..تجنني .. وعم ترغي وتزبد متل البحر الهايج .. ؟!!
شو منكمل واللا منسكت .. ؟!! .
- لاه ..شو تسكت .. سد بوزك إذا بتريد .. اسمعها مني أحسن ماتسمعها من شي بغل يروح بعدها يناولك رفسه يجيب آخرتك معها . .
• شو رأيك منأجلها شوي .. وإذا ماصار شي ..منرجع منكمل ..
- يعني منعمل ( تيست ) والله معقوووول .. مامعك سيكارة ..حاكم علبتي خلصت .
• ياحبيبي وأنا علبتي خلصت .. العمى حرقنا علبتين ونحنا مش حاسين على حالنا .
- روح نضربلنا نفسين اركيلة بلدي من العيار التقيل ونطرق كام فنجان قهوة مغلية كتير وسادة ..وهيك يمكن يتعدل مزاجنا .
• رووووووح . مع إنو لاالقهوة ولا السبيرتو والبنزين بينفعوا .

**ميران** · #2 06-25-2009, 10:54 AM

استاذ خليل ..
قضايا ع المحك

يسلمو

رحيق · #3 07-08-2009, 04:52 PM

الاستاذ خليل صارم
كتبت فاحسنت
لافض فو
رحيق

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري